♦  სათბურების მოწყობა: საქმიანობის დაწყებიდან დღემდე, Zrda-ს მხარდაჭერით მოეწყო სათბურის 70 სადემონსტრაციო ნაკვეთი შიდა ქართლში, ქვემო ქართლში, სამეგრელოსა და კახეთში (ახმეტის მუნიციპალიტეტი).

♦ კენკროვანი კულტურების სანერგეების მოწყობა: Zrda-მ 4 სამიზნე რეგიონში კენკროვანი კულტურების 6 კომერციული სანერგე/სადემონსტრაციო ნაკვეთი მოაწყო და ისინი აშშ-დან, სერტიფიცირებული მომწოდებლისგან, მიღებული 17,500 მაღალი ხარისხის ნერგით მოამარაგა.  მაგალითად, Zrda, შპს „აგრო აგორას“ დაეხმარა, აფხაზეთის ადმინისტრაციულ საზღვართან ახლოს მდებარე სოფელ რუხში, სამეგრელოს რეგიონში პირველი კომერციული მოცვის სანერგეს მოწყობაში. ამ ინიციატივის გასაძლიერებლად, Zrda ასევე უზრუნველყოფს ტექნიკურ მხარდაჭერას ქართველი და უცხოელი ექსპერტების მონაწილეობით აგრონომიისა და სანერგეების ბიზნეს მოდელებთან დაკავშირებით. მთლიანობაში, რუხის მოცვის სანერგე, სრულად ამუშავების პირობებში,  ყოველწლიურად 100,000-მდე ახალი ნერგის წარმოებას შეძლებს.  მუშაობის მეორე წელს სანერგე ყოველწლიურად სულ მცირე 50 ფერმერს მოემსახურება, დაეხმარება რა მათ მინიმუმ 36 ჰა-ზე მოცვის პლანტაციების მოწყობაში. ეს რიცხვები მზარდია. აღნიშნული ინიციატივა ადგილობრივ ბაზარზე არსებული მოთხოვნის დასაკმაყოფილებლად დაიწყო - ამჟამადაც ცოცხალ კენკრასა და კენკროვანი კულტურების სხვადასხვა ნაწარმზე მოთხოვნა მიწოდებას აღემატება.

♦ საკონსულტაციო და საინფორმაციო ცენტრების პოტენციალის გაზრდა და განვითარება: Zrda ზრუნავს 17 საინფორმაციო და საკონსულტაციო ცენტრის (ICCs) გაუმჯობესებაზე, უზრუნველყოფს რა მათ აღჭურვას საველე ლაბორატორიული ხელსაწყოების კომპლექტებით შემდეგ რეგიონებში: ზუგდიდში, წალენჯიხაში, ბოლნისში, მარნეულში, ახმეტაში, წალკაში, დუშეთში, ქარელში, გორში, ხაშურში, კასპში, ახალციხეში, ნინოწმინდაში, ასპინძაში, ახალქალაქში, ბორჯომსა და ადიგენში. აღნიშნული ლაბორატორიული ხელსაწყოების მობილური კომპლექტი ICC სპეციალისტებს საშუალებას აძლევს ფერმერებს მცენარეთა კვების, მავნებლებთან, ნიადაგის მჟავიანობასა (pH) და წყლის მინერალიზაციასთან დაკავშირებული პრობლემების იდენტიფიცირებაზე მიზანმიმართული სასარგებლო და პრაქტიკული დახმარება გაუწიონ და ამ გზით ხელი შეუწყონ მათ პროდუქციის ხარისხის გაუმჯობესებაში, მიწოდებული მომსახურების და გაყიდული პროდუქციით მიღებული შემოსავლის გაზრდაში. ICC სპეციალისტებისთვის Zrda-ს მიერ მიწოდებული ტრენინგებისა და სახელმძღვანელოების დახმარებით ICC ექსპერტები პროექტის სამიზნე რეგიონებში მომუშავე 50 ფერმერს დაეხმარნენ ფოთლის და ნიადაგის ანალიზების ჩატარებასა და დაავადებების იდენტიფიცირებაში. ინიციატივის მხარდასაჭერად Zrda-მ მოიზიდა MASHAV და USAID/Farmer to Farmer (F2F) ექსპერტები, საუკეთესო საერთაშორისო პრაქტიკული საქმიანობის განსახორციელებლად და თანამედროვე ტექნოლოგიების გამოსაყენებლად, მოსავლიანობის გაზრდისა და პროდუქციის ხარისხის გაუმჯობესების მიზნით.

♦ კერძო სექტორის საექსტენციო მომსახურების მხარდაჭერა ფერმერთა მომსახურების ცენტრებისთვის: Zrda-მ მხარი დაუჭირა კერძო სექტორში მომუშავე ფერმერთა მომსახურების ოთხ ცენტრს (FSC), აღჭურვა რა თითოეული მათგანი საველე ლაბორატორული ტესტირების ინსტრუმენტებით და მათ მემცენარეობის ახალი ტექნოლოგიები გააცნო. ფერმერთა მომსახურების ცენტრებში დანერგა ახალი სერვისი, საინფორმაციო საკონსულტაციო პაკეტების სახით, 350 ლარის ღირებულების საკონსულტაციო პაკეტები მოიცავს: 5 საველე ვიზიტს ფერმერთა მეურნეობებში, ლაბორატორიულ ანალიზებსა და კონსულტაციებს. Zrda-მ ერთი წლის განმავლობაში, პაკეტის ღირებულების 70%-იანი სუბსიდირება მოახდინა, რომელიც მომდევნო წლების მანძილზე თანდათანობით დაიკლებს იმის საფუძველზე, რომ ფერმერების მხრიდან პაკეტის ღირებულება უფრო მეტად მისაღები გახდება. Zrda იწვევს სოფლის მეურნეობის პროფესიული ცენტრების სტუდენტებს FSC-ში პრაქტიკული გამოცდილების მისაღებად. სტუდენტებს შესაძლებლობა აქვთ FSC-ის ექსპერტებთან ერთად განახორციელონ საკონსულტაციო ვიზიტები ფერმერებთან. წარმატებული სტაჟიორები FSC-ში დასაქმდებიან.

♦  მობილური აპლიკაცია „აგრონავტი“: მობილური აპლიკაცია „აგრონავტი“ 2017 წელს, საქართველოს ფერმერთა ასოციაციისა და Zrda-ს ერთობლივი ძალისხმევით შეიქმნა. „აგრონავტი“, მარტივი და მოქნილი ელექტრონული სისტემაა, რომელიც ფერმერს საკუთარი ნაწარმის გასაღების, ახალი ბაზრის მოძიებისა და კავშირების დამყარების საშუალებას აძლევს. „აგრონავტი“-ს აპლიკაციას 3000-მდე დარეგისტრირებული მომხმარებელი ჰყავს. ფერმერები რეგულარულად აახლებენ ინფორმაციას საკუთარი პროდუქტის შესახებ და ჩართულები არიან მის გასაღებაში.  აპლიკაციის შექმნიდან დღემდე, მისი მეშვეობით, საქართველოს ფერმერთა სადისტრიბუციო კომპანიამ ადგილობრივი ფერმერების მიერ წარმოებული 1.7 მილიონი ლარის ღირებულების პროდუქცია მიიღო და გაყიდა.

♦ Kalo.ge: USAID/Zrda-ს და კრედო ბანკის მხარდაჭერით, Zrda-ს პარტნიორმა ორგანიზაციამ - "ასოციაცია სამხარეო განვითარება მომავალი საქართველოსთვის" (RDFG), შექმნა ონლაინ პლატფორმა www.kalo.ge.  www.kalo.ge  წარმოადგენს ფერმერებისთვის განკუთვნილ ონლაინ მაღაზიასა და მომსახურების ინტერნეტ სივრცეს. პლატფორმის მეშვეობით საგანმანათლებლო ინფორმაცია და ვიდეო ინსტრუქციები გავრცელდება, ფერმერები მიიღებენ აგრო კონსულტაციებს და წვდომა ექნებათ აგროკალენდართან. ამასთანავე www.kalo.ge -ზე იქნება შესაძლებელი კრედო ბანკის სესხზე და სხვა ფინანსურ პროდუქტებზე განაცხადის შევსებაც.

♦ ქართული სანიმუშო სასოფლო-სამეურნეო პრაქტიკის (GAP) სერტფიცირება: Zrda, საქართველოს ფერმერთა ასოციაციასთან და სოფლის მეურნეობის სამინისტროსთან ერთად, მხარს უჭერს კონკრეტულ კულტურებზე მორგებული ადგილობრივი GAP სტანდარტების შემუშავებას.

♦ საბაზრო კავშირები: „ქართულ აგროსახლთან“ გაფორმებული მემორანდუმის საფუძველზე,  Zrda-ს ბენეფიციარი ფერმერები საქართველოს აგრო-სახლის მიწოდების ჯაჭვში მონაწილეობენ და ხელს უწყობენ ხილისა და ბოსტნეულის მაღალხარისხიანი ბაზრების გავითარებას, პროექტის 17 სამიზნე მუნიციპალიტეტში. ეს სასოფლო-სამეურნეო კულტურებია: პომიდორი, კიტრი, ბადრიჯანი, ტკბილი წიწაკა, მწარე წიწაკა და სტაფილო. Zrda-მ და საქართველოს ფერმერთა ასოციაციამ ერთობლივად, საქართველოს ფერმერთა სადისტრიბუციო კომპანიასთან და აჭარა ჯგუფთან პარტნიორობით შექმნეს მობილური აპლიკაცია „აგრონავტი“, რომელიც ფერმერებს პროდუქტის რეალიზებაში, ახალი ბაზრის მოძიებისა და სავაჭრო კავშირების დამყარებაში ეხმარება. შექმნიდან დღემდე, მისი მეშვეობით, საქართველოს ფერმერთა სადისტრიბუციო კომპანიამ ადგილობრივი ფერმერების მიერ წარმოებული 1.7 მილიონი ლარის ღირებულების პროდუქცია მიიღო და გაყიდა.

♦ მოსავლის აღების შემდგომი პროცედურების გაუმჯობესება: საქართველოს ლოგისტიკის ასოციაცია (GLA), Zrda-ს მხარდაჭერით, მიზნად ისახავს უზრუნველყოს „მოსავლის აღების შემდგომი პროცედურების  ტრენინგ კურსი“-ს (PHHM) მდგრადობა და მისი დადებითი გავლენა მოსავლის აღების შემდგომი პროცედურების გაუმჯობესებაზე. ამ მიზნით, ის ხელს უწყობს ისეთ დაინტერესებულ საგანმანათლებლო ინსტიტუტებს, როგორებიცაა: სამცხე-ჯავახეთის სახელმწიფო უნივერსიტეტი (ახალციხე), ევრორეგიონული პედაგოგიური უნივერსიტეტი (გორი) და საქართველოს ტექნიკური უნივერსიტეტი (თბილისი) - აგრონომიულ ფაკულტეტების სილაბუსების მოდიფიცირებასა და მათ სასწავლო პროგრამებში (PHHM)-ის მოდულების გათვალისწინებაში.